Njëzet euro taksë për pasagjerët e kroçerave që zbresin në ishujt grekë

<p>Greqia do të vendosë një kontribut prej 20 eurosh për pasagjerët e kroçerave që ndalojnë në ishujt shumë të njohur, Mykonos dhe Santorini.</p> <p>Këtë e ka bërë të ditur kryeministri Kyriakos Mitsotakis.</p> <p>“<em>Greqia nuk ka problem strukturor të mbiturizmit, ka problem në disa destinacione, në disa javë apo në disa muaj të vitit</em>”, komentoi Mitsotakis, në një konferencë për shtyp gjatë një panairi.</p> <p>“<strong><em>Industria e lundrimit ka ushtruar presion mbi Mykonos dhe Santorini, kështu që çmimi do të jetë 20 euro</em></strong>”, shtoi ai pa specifikuar se kur do të hyjë në fuqi kjo masë.</p> <p>Në vitin 2023, rreth 800 anije lundrimi me 1.3 milionë pasagjerë prekën ishullin e Santorinit ku jetojnë vetëm 15 500 banorë, sipas shoqatës greke të porteve. Nga rekord 32.7 milionë turistë që vizituan Greqinë vitin e kaluar, rreth 3.4 milionë - ose një në dhjetë vizitorë - shkuan në ishullin e Santorinit. Kryeministri synon “të ndërhyjë në numrin e anijeve që mbërrijnë në destinacionin e tyre në të njëjtën kohë”, duke e gjykuar të nevojshme “të vërë frenat në ishujt ku besojmë se po vihen në provë kufijtë e infrastrukturës”.</p>