Duke e cilësuar kalimin me makinë rreth Sheshit Skënderbej në Tiranë një torturë të vërtetë, inxhinieri Xhevahir Ngjeqari tha se ky problem është i zgjidhshëm. Siç u shpreh ai në emisionin “Arnautistan” në MCN TV ndërtimi i 3 nënkalimeve do zgjidhte problemin e trafikut në kryeqytet.
“Nevojiten 3 nënkalime që të zhbllokohet qarkullimi. Një nga Rruga e Durrësit që të dalë direkt tek Rruga e Dibrës, një te Rruga e Kavajës në drejtim të Avni Rustemit dhe një tek Zogu I në drejtim të Universitetit Politeknik. Edhe nëse ndërtohet metroja e Tiranës është llogaritur që këto nënkalime të mos dëmtohen. Zhbllokimi i sheshit kryesor duhen bërë domosdoshmërisht. Kalimi sot rreth Sheshit Skënderbej është një torturë e vërtetë. Të gjitha makinat që bëjnë unazën e vogël janë të detyrueshme të kalojnë tek Torre Drrini që është rrugë shumë e ngushtë dhe harxhon kohë dhe karburant. Tre nënkalimet do ta zgjidhnin trafikun”, tha Ngjeqari.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
