Fëmijët deri në 3 vjeç e transmetojnë më lehtë Covid

Fëmijët më të vegjël mund të kenë më shumë gjasa të transmetojnë koronavirusin sesa fëmijët më të mëdhenj.

Kjo tregohet nga rezultatet e një studimi të ri të botuar në revistën JAMA Pediatrics që shqyrtoi të dhënat shëndetësore nga Ontario, Kanada, duke vlerësuar rastet e Covid-19 që ndodhën midis 1 qershorit dhe 31 dhjetorit 2020 në 6,280 familje, rasti i indeksit të të cilëve ishte nën mosha 18 vjeç.

Nga këto, 1,717 (27.3%) përjetuan transmetim dytësor, me të paktën një anëtar tjetër të familjes të infektuar brenda dy javësh nga rasti fillestar.

Analiza, që synon të qartësojë rolin e fëmijëve në përhapjen virale, nxori në pah dallime të rëndësishme në rrezikun e transmetimit sipas grupmoshës (0-3 vjeç, 4-8, 9-13 dhe 14-17).

Në veçanti, probabilitetet më të mëdha të përhapjes në familje u gjetën tek fëmijët e moshës 0 deri në 3 vjeç, pavarësisht faktorëve të tillë si prania e simptomave, rihapja e shkollave ose çerdheve, apo shoqërimi me shpërthimet e shkollave.

"Rezultatet tona, janë në përputhje me dy studime daneze të cilat treguan se në mesin e fëmijëve ka një probabilitet të shtuar të transmetimit të infeksionit me moshën më të re. Gjithashtu një studim i kryer në Spanjë tregoi se raporti më i lartë i rrezikut për transmetim lidhet me indeksin e rasteve të moshës 0 deri në 2 vjeç në krahasim me grupin 12-15 vjeç, megjithëse intervalet e besimit të kësaj analize ishin të gjera.

Megjithëse fëmijët nuk duket se e transmetojnë infeksionin me të njëjtën ritëm si të rriturit, profesionistët e shëndetit duhet të jenë të vetëdijshëm për rrezikun e transmetimit në prani të fëmijëve të vegjël.

Meqenëse mund të jetë e vështirë dhe ndonjëherë e pamundur të izolohen fëmijët e sëmurë, masa të tjera kontrolli duhet të zbatohen kudo që të jetë e mundur, përfshirë përdorimin e maskave, rritjen e larjes së duarve dhe ndarjen midis vëllezërve dhe motrave.