Kuvendi i Shqipërisë, me 75 vota të shumicës së majtë vendosi të pranojë kërkesën e prokurorëve të SPAK për heqjen e imunitetit të Berishës, duke i hapur rrugë arrestimit të tij, lidhur me akuzat për rolin e tij si ish-kryeministër në privatizimin e ish-kompleksit “Partizani”.
Për analistin Neritan Sejamini i ftuar në emisionin “Të Paekspozuarit”, në MCN TV, kjo ishte e pritshme.
Sipas tij ka shumë dritëhije në vendimin e prokurorisë e të SPAK-ut që nuk të lënë shijen e një lëvizjeje legjitime të drejtësisë.
Ishte vendim i pritshëm. Nuk besoj se Kuvendi i Shqipërisë do të vendoste ndryshe. Ka një vendosmëri që kësaj çështjeje do t’i vihen deri në fund, jo vetëm me heqjen e imunitetit, por edhe me atë se çfarë vendimi do të marrë gjykata, ndoshta me një arrest në shtëpi.
Nga pikëpamja personale më duket një ngjarje tragjike dhe dramatike për karrierën e një njeriu që ka qenë një figurë e rëndësishme e tranzicionit shqiptar, me të mirat dhe të këqijat e veta, kontributet pozitive dhe negative.
Do ma donte mendja dhe një farë mirëkuptimi që gjërat të mos vijnë në këtë pikë për udhëheqësit e një vendi.
Shqipëria i ka tragjike ngjarjet në lidhje me udhëheqësit e vet dhe nuk është çështje vetëm e këtyre udhëheqësve, por edhe e shoqërisë sonë, mënyra se si i glorifikojmë dhe i përdhosim heronjtë dhe idhujt e rremë.
Nga pikëpamja e drejtësisë, do të ishte mirë që ky të perceptohej si vendim i drejtësisë së paanshme dhe të vërtetë.
Fatkeqësisht, edhe për faktet që ne kemi diskutuar, për shumë dritëhije në vendimin e prokurorisë e të SPAK-ut, nuk më lë shijen e një lëvizjeje legjitime të drejtësisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
