Protestat e studentëve dhe qytetarëve në Shkup kanë sjellë në qendër të vëmendjes çështjen e përdorimit të gjuhës shqipe në institucionet shtetërore, konkretisht në provimin e shtetit për juristët e rinj.
Demonstruesit kërkojnë respektimin e të drejtave gjuhësore dhe kanë ngritur thirrje për dorëheqjen e kryeministrit Hristijan Mickoski.
I ftuar në një lidhje për MCN TV, drejtori i Institutit për Politikë dhe Ekonomi, Bashkim Selmani, e cilësoi situatën si një shkelje të hapur të ligjit dhe të parimeve demokratike.
Moslejimi i juristëve të rinj të përdorin gjuhën shqipe në provimin e shtetit përbën shkelje ligjore dhe cënon parimin e demokracisë. Sa i përket Kushtetutës dhe ligjit, ato e lejojnë përdorimin e gjuhës shqipe, por në praktikë kjo nuk zbatohet.
Sipas tij, kjo situatë cenon drejtpërdrejt barazinë para ligjit dhe dinjitetin e të rinjve shqiptarë në Maqedoninë e Veriut.
Mohimi i të drejtës për të përdorur gjuhën shqipe në provim shtetëror përbën cenim të barazisë para ligjit dhe sjell pasoja të shumta për komunitetin shqiptar. Moslejimi i provimeve në shqip është shkelje e Kushtetutës.
Selmani nënvizoi se reagimi i studentëve është një përgjigje ndaj padrejtësisë dhe një përpjekje për të mbrojtur identitetin dhe të drejtat themelore.
Studentët shqiptarë i përgjigjen kësaj padrejtësie me protesta për gjuhën e tyre. Pa gjuhë nuk ka barazi.
Ai shtoi se situata lidhet edhe me tensione më të gjera politike dhe frymë nacionaliste, duke paralajmëruar për pasoja në marrëdhëniet ndëretnike dhe në zbatimin e Marrëveshjes së Ohrit.
Nacionalizmi institucional i RMV e ka marrë si shaka këtë çështje. Zgjidhja është e thjeshtë: zbatimi i ligjit. Nuk ka ligje negative, por ka qëndrime negative nga ligjvënësit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
