Avokati Kujtim Cakrani tha përmes një lidhjeje të drejtpërdrejtë me studion e MCN Live se Altin Ndoci nuk u arratis, por u lirua dhe se e gjithë kjo situatë është dështim i Drejtorisë së Burgjeve.
Duke vijuar Cakrani tha se personi i parë që duhej pushuar është Drejtori i Përgjithshëm i Burgjeve.
Sipas Cakranit, nevojitet një reformë e thellë në sistemin e burgjeve.
Kjo ishte një lirim. Një liri për të cilën duhet hetuar. E dimë shumë mirë, kemi klientët dhe dimë si funksionon sistemi i burgjeve, protokolli si i shoqërojnë njerëzit dhe masat që merren kur i shoqërojnë në spital. Arratisje quhet kur arratisesh me tunele, prishje të mureve. Kjo ishte një shoqërim për në liri.
Është një dështim total i Drejtorisë së Përgjithshme të Burgjeve dhe nëse do kishte një person që duhej pushuar, është drejtori i burgjeve, dhe pastaj duhet të vijojë me drejtorin e burgut të Durrësit dhe të gjithë zinxhirin komandues.
Çdo kush që është në izolim, padyshim kërkon lirinë. Kjo nuk është herezi që një i burgosur largohet nga vendi i vuajtjes së dënimit.
Ministri i Drejtësisë duhet të reflektojë për sistemin e burgjeve dhe kërkohet reformë e thellë, që nga administrimi, drejtori i burgjeve, dhe pastaj duhen parë pagat e punonjësve. Burgjet shqiptare janë të pasigurt. Për mua, është liruar, nuk është arratisur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
