Shtetet e Bashkuara i bëjnë thirrje qytetarëve amerikanë që të tregohen të kujdesshëm ditën e nesërme për shkak të protestës kundër importit të plehrave. Përmes një njoftimi në faqen e saj zyrtare, Ambasada e SHBA-së në Tiranë kërkon që të shmangen akset ku do të kalojnë protestuesit.
Por ajo që bie në sy është se SHBA e cilëson protestën si të organizuar nga partitë opozitare, dhe jo qytetarët.
“Ambasada e SHBA-së në Tiranë informon qytetarët e SHBA-së se partia opozitare shqiptare po organizon një demonstratë kundër importit të mbetjeve jo të rrezikshme në Shqipëri, të planifikuar për të filluar të shtunën, më 1 tetor, në orën 11:00. Protestuesit pritet të mblidhen në afërsi të qendrës Tajvan, në Bulevardin Dëshmorët e Kombit, për të shkuar drejt ndërtesës së Kryeministrisë. Një turmë e madhe e protestuesve është parashikuar që të rëndojë trafikun. Ambasada nuk është në dijeni për ndonjë kërcënim të veçantë kundër qytetarëve apo interesave të SHBA-së. Megjithatë, qytetarët amerikanë duhet të jenë vigjilentë dhe të shmangin çdo demonstratë apo tubime.”, thuhet në njoftim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
