Ndërsa palët flasin për negociata premtuese që do të çojnë drejt një marrëveshjeje mes Shqipërisë dhe Greqisë, ministri i Mbrojtjes i kësaj të fundit, Panos Kamenos, ka një qëndrim krejt tjetër. Në një prononcim të publikuar në mediat greke, ai i cilëson çamët “kriminelë lufte”, ndërsa shton se më në fund “Shqipëria po fillon të kuptojë se është në të mirë të saj të ketë marrëdhënie të mira me Greqinë”.
"Epiri i Veriut është zona ku grekët ekzistonin dhe do të ekzistojnë. Pakica do të mbrohet. Çfarë thuhet në lidhje me pretendimet pronësore nuk është e lidhur me çamët. Ata janë kriminelë lufte që bashkëpunuan me nazistët, dhe ne nuk flasim me kriminelët e luftës”, shprehet ai.
Kamenos nuk shfaq dakordësi as me marrëveshjen e arritur dy javë më parë me Maqedoninë për çështjen e emrit. Ai thotë se kjo marrvëeshje nuk mund të hyjë në fuqi pa miratimin e popullit grek, që lë të hapur mundësinë e një referendumi.
Sipas Kamenos, ratifikimi i marrëveshjes nuk është i vlefshëm as në Shkup përsa kohë nuk mban ende firmën e presidentit Ivanov.
Ratifikimi i marrëveshjes dhe hyrja e saj në fuqi i hap rrugën Maqedonisë për t’u bërë pjesë e NATO-s. Por Kamenos duket i vendosur për ta penguar këtë gjë.
“Nuk ka të ardhme për Shkupin në NATO pa u kaluar kjo marrëveshje dhe unë do të siguroj që ajo të mos ratifikohet”, shprehet ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
