Kolumbia përballet me një nga thatësirat më të këqija

Miliona banorë të kryeqytetit kolumbian Bogota janë të detyruar të kufizojnë përdorimin e ujit për shkak të thatësirës që ka prekur vendin.

Fenomeni El Niño po i shtyn nivelet e rezervuarëve në pikën e tyre më të ulët në dekada, me zyrtarët që kanë ndërprerë shërbimet e ujit me radhë për 24 orë në zona të caktuara.

Spitalet dhe shkollat janë sigurisht të përjashtuara. Kryebashkiaku i qytetit e quajti situatën tragjike. Kufizimet e shpallura në fillim të javës hynë në fuqi të enjten. Autoritetet do të rivlerësojnë situatën çdo dy javë si pjesë e planit të shpërndarjes së ujit.

“Le të mos harxhojmë asnjë pikë ujë në Bogota tani,” tha kryebashkiaku Carlos Fernando Callan në një konferencë shtypi, duke shtuar: “Kjo do të na ndihmojë t’i heqim këto kufizime më shpejt ose t’i reduktojmë ato. ”

Mungesa e shiut dhe nxehtësia e pazakontë kanë bërë që rezervat e Kolumbisë të thahen në një shkallë alarmante. Që nga viti i kaluar, qyteti ka përjetuar periudha të gjata të thata për shkak të ndikimit të El Niño, sipas autoriteteve lokale.

El Niño është një model klimatik natyror me origjinë nga Oqeani Paqësor përgjatë ekuatorit, i cili ndikon në motin në mbarë globin. Në Kolumbi, ka nxitur temperatura më të larta dhe reshje më të ulëta.

Në një vend po aq të ndarë politikisht sa Kolumbia, urgjenca e adresimit të El Niños është një pikë e rrallë konsensusi. Qeveria nxori një dekret për fatkeqësinë natyrore në janar për të mobilizuar burimet në një përpjekje për të luftuar efektet e saj shkatërruese, duke përfshirë zjarret dhe stresin e ujit.

Planet e racionimit të ujit të Bogotas janë mbështetur nga presidenti i vendit, i cili historikisht ka pasur një marrëdhënie të sprovuar me kryebashkiakun e qytetit.

Ndërsa ngrohja globale e bën motin ekstrem si valët e të nxehtit dhe thatësirën më të zakonshme dhe më të rënda, ekspertët paralajmërojnë se stresi në sistemet e ujit të qyteteve vetëm do të rritet.

Ministrja e mjedisit e Kolumbisë, Susana Muhamad u kërkoi autoriteteve të qytetit të hartojnë plane afatgjata për pakësimin e furnizimeve me ujë.