Spanja liron gabimisht një nga kriminelët më të kërkuar në Evropë

Një nga kriminelët më të kërkuar në Europë, u lirua nga drejtësia spanjolle për shkak të një pakujdesie.

Një gabim burokratik, pas kërkesës për ekstradim nga Holanda bëri që “mbreti” i trafikantëve holandezë të drogës, në listën e më të kërkuarve evropianë të Interpolit, të lirohet nga një burg spanjoll dhe aktualisht ndodhet në arrati.

Karim Bouyakhrichan, 46 vjeç, me nofkën “Taxi”, u arrestua në janar në Marbella me akuzën e pastrimit të parave, pas një hetimi 5-vjeçar.

Disa javë më parë autoritetet holandeze kërkuan dhe morën nga gjykata e Madridit ekstradimin.

Por diçka nuk shkoi siç pritej, ndoshta për shkak të një keqkuptimi ose një gabimi komunikimi, pa dijeninë e holandezëve.

Prokuroria e Hagës deklaroi se burgu i Malagës autorizoi, në pritje të riatdhesimit, lirimin e të burgosurit me kusht, siç kërkuan avokatët e tij.

Pasaporta u tërhoq dhe kontakti me gjykatën u caktua çdo 15 ditë, gjë që ndodhi deri më 1 prill, por pas kësaj nuk pati më asnjë lajm për “Taxi” .

“Arratisja është shqetësuese, por do ta gjejmë”, tha ministri spanjoll i Drejtësisë Felix Bolanos.

I arratisuri është ndër kriminelët më të kërkuar në të gjithë Evropën, pasi me vdekjen e vëllait të tij Samir, i cili kishte themeluar një nga krahët e shoqatës holandeze-marokene “Mocro Maffia”, trashëgoi “perandorinë” e saj, duke marrë përsipër trafikun e kokainës.

Karteli pastroi miliarda euro duke sjellë drogë nga Amerika e Jugut përmes porteve të Amsterdamit dhe Roterdamit, dhe sipas mediave holandeze kishte kërcënuar me rrëmbim princeshën Amalia, trashëgimtare të fronit, duke e detyruar atë të transferohej në Spanjë një vit, për arsye sigurie.