NASA nis misionin e ri IMAP për të zbuluar “mburojën kozmike” që mbron Tokën

Sistemi ynë diellor është i rrethuar nga një mburojë natyrore kozmike e quajtur heliosferë, e krijuar nga era diellore që del nga Dielli dhe që na mbron nga rrezatimi i rrezikshëm kozmik. Tani, NASA ka nisur një mision të ri ambicioz për të kuptuar më mirë këtë zonë të panjohur të hapësirës.

Misioni i ri IMAP (Interstellar Mapping and Acceleration Probe) ka për qëllim të zbulojë se si era diellore përplaset me hapësirën ndëryjore dhe si formohet kufiri i heliosferës, një zonë që ndodhet tre herë më larg se distanca midis Tokës dhe Plutonit.

Anija kozmike është e pajisur me 10 instrumente moderne që do të krijojnë hartën më të detajuar të heliosferës deri më sot, duke përmirësuar informacionet e mbledhura nga misionet e mëparshme si Voyager dhe IBEX.

Heliosfera vepron si një flluskë mbrojtëse që mbron jetën në Tokë nga rrezet kozmike. IMAP do të ndihmojë NASA-n të: Parashikojë më saktë stuhitë diellore që mund të ndikojnë satelitët, komunikimet dhe rrjetin elektrik. Kuptojë se si rrezatimi nga Dielli ndikon astronautët në hapësirë. Zbulojë më shumë për formën dhe kufijtë e heliosferës.

Shkencëtarët pritet të marrin të dhëna të sakta për atomët neutralë energjikë (ENA), grimca të rëndësishme që ndihmojnë në “fotografimin” e strukturës së heliosferës.

Një nisje me tre misione

IMAP u nis me një raketë SpaceX Falcon 9 nga Florida, së bashku me dy satelitë të tjerë:

Observatori Carruthers Geocorona, që do të studiojë shtresën më të jashtme të atmosferës së Tokës.

SWFO-L1, një mision i NOAA-s që do të monitorojë stuhitë diellore dhe të dërgojë paralajmërime të hershme për rrezik.

Sipas NASA-s, SWFO-L1 do të mundësojë dërgimin e imazheve të stuhive diellore vetëm 30 minuta pas vëzhgimit, shumë më shpejt se misionet ekzistuese.

Shkencëtarët e NASA-s thonë se IMAP do të sjellë "fotografi ekstremisht të detajuara" të kufijve të heliosferës, duke shpjeguar më mirë se si sistemi ynë diellor mbron veten nga hapësira ndëryjore.

“Ky është udhëtimi përfundimtar kozmik,” tha Dr. Joe Westlake nga NASA. “Do të na japë një kuptim të ri të motit hapësinor që prek çdo njeri në Tokë.”