Kryeministri Edi Rama njoftoi krijimin e Operatorit Kombëtar të Trajtimit të Mbetjeve, një agjenci e re që do të jetë në funksion të gjithë vendit, ndërsa bashkitë do të jenë përdoruesit kryesorë të saj.
Kreu i qeverisë theksoi se kjo agjenci është parashikuar në projektligjin e ri për menaxhimin e integruar të mbetjeve.
Në një intervistë për edicionin e lajmeve në MCN TV, eksperti i mjedisit, Enri Koçani, theksoi se shqetësimet më të mëdha në procesin e menaxhimit të mbetjeve në Shqipëri nuk lidhen me depozitimin, por me grumbullimin e mbetjeve në fazën e parë.
Patjetër që tri landfillet e reja do të ndihmojnë në përmirësimin e sistemit të menaxhimit të mbetjeve në këto qarqe.
Duhet të kuptojmë se ndarja e Shqipërisë në dhjetë zona mbetjesh është e lidhur me grupimin e bashkive dhe qarqeve që depozitojnë mbetjet fundore. Siç është rasti në Kukës, Dibër dhe Berat, kjo ndihmon shumë në menaxhimin e mbetjeve.
Problemi kryesor i Shqipërisë me menaxhimin e mbetjeve nuk është vetëm depozitimi fundor i tyre dhe trajtimi i tyre me landfillet ose inceneratorët, por më shumë me ofrimin e shërbimit për grumbullimin e mbetjeve para se ato të shpërndahen dhe të dëmtojnë mjedisin.
Shpesh kemi parë mbetje të shpërndara në territore të pakontrolluara.
Për sa i përket "rreziqeve" që mund të lindin në rast se pushteti vendor nuk do të menaxhojë më drejtpërdrejt procesin e mbetjeve, Koçani vlerëson se historikisht menaxhimi i mbetjeve ka qenë në duar të pushtetit vendor, dhe efektiviteti i Operatorit Kombëtar duhet të vlerësohet vetëm kur ai të jetë në funksion.
Efektiviteti mund të vlerësohet vetëm kur sistemi të jetë në operim.
Thjesht një deklaratë e kryeministrit dhe ministres nuk është e mjaftueshme për të kuptuar se si do të funksionojë ky sistem.
Ai duhet të mbështetet me rregullore dhe ligje të qarta.
Roli i Operatorit Kombëtar duhet të jetë në kontrollin e sistemit rajonal të menaxhimit të mbetjeve, porse kjo duhet të verifikohet në terren për të parë efektivitetin real.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
