Zbulohen detaje tronditëse nga ngjarja e rëndë e zbuluar mëngjesin e sotëm në Korçë, ku një foshnjë e sapolindur u gjet e pajetë, e mbyllur në një valixhe.
Nga të dhënat paraprake mësohet se foshnjën e seksit mashkull, e ka gjetur të vdekur në banesë bashkëshorti i gruas që e ka sjellë në jetë, teksa kjo e fundit mendohet se e ka mbyllur në valixhe.
Korrespondentja e MCN TV raporton nga Korça, se foshnja është gjetur në gjendje dekompozimi dhe se pas këqyrjes së kufomës, është konstatuar se bëhej fjalë për një vogëlush të gjinisë mashkull.
Mësohet se nëna shfaq prej kohësh probleme të rënda të shëndetit mendor dhe se nuk është në gjendje të japë deklarime para policisë, teksa shtatzënia e saj nuk ishte konstatuar më herët nga familjarët.
Bazuar në dëshminë e fqinjëve, thuhet se kishte raste kur familjarë ose të afërm të saj shkonin për ta vizituar, pasi i shoqi ishte emigrant në Greqi.
Ishte pikërisht ky i fundit i cili pasi konstatoi aromë të rëndë në banesë, zbuloi trupin e pajetë të foshnjës brenda një valixheje mëngjesin e kësaj të hëne, duke bërë denoncim në polici.
Burri ka thënë para uniformave blu se kishte mbi një vit që nuk ndodhej në Shqipëri, duke mohuar kësisoj atësinë e fëmijës.
Sakaq çifti ka edhe një fëmijë tjetër rreth 15 vjeç, i cili vuan nga probleme të spektrit autik.
Një fqinje e gruas tha për mediat se nuk e kishin konstatuar shtatzëninë e gruas ndonëse jetonin në të njëjtin pallat.
Shumë e sëmurë është e gjora, në katin e dytë rrinte. I shoqi rri në Greqi. Vete dhe vjen. E sëmurë ka qenë dhe më parë. Ka një djalë por nuk e ka mirë, e ka me të meta mendore. Nuk dinim gjë për shtatzëninë.
Lidhur me ngjarjen policia tha se, në orët e para të mëngjesit të sotëm, shtetasi K. Asimllari, emigrant në Greqi, ka bërë kallëzim në Komisariatin e Policisë Korçë, se ka gjetur në banesën e tij, në lagjen nr. 15, Korçë, një foshnjë të pajetë.
Bashkëshortja e tij, e cila vuan nga sëmundje të shëndetit mendor është transportuar në maternitetin e qytetit, për ekzaminime të mëtejshme.
Grupi hetimor po punon për sqarimin e rrethanave dhe dokumentimin e plotë të kësaj ngjarjeje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
