Në kërkim për vrasjen e kryepolicit Arben Zylyftari, arrestohet në Gjermani Genc Tafili

Është arrestuar në Gjermani Genc Tafili, i cili ishte shpallur në kërkim për vrasjen e kryepolicit të Shkodrës Arben Zylyftari në vitin 2000.

Bëhet me dije se një nga dy vëllezërit e dyshuar për vrasjen e kryepolicit, është arrestuar këtë të martë në Gjermani.

Kujtojmë se Arben Zylyftari, kryepolici i Shkodrës u vra në vitin 2000 në krye të detyrës pas një breshëri plumbash automatiku në një operacion.

Operacioni po zhvillohej gjatë një kontrolli për armë në liqenin e Shkodrës, kur policia ra në gjurmë të një personi shumë të kërkuar, por u has me breshëri plumbash prej tyre. Personat që qëlluan ishin Behar Tafili dhe djali i tij Admir Tafili, ku gjatë të shtënave u vra jo vetëm kryepolici i Shkodrës Zylyuftari por edhe Behar Tafili.

Për ngjarjen policia arrestoi Admir Tafilin i cili u dënua me burgim të përjetshëm dhe Genc Tafilit. Ky I fundit u lirua nga burgu me kusht nga gjyqtarja Enkelejda Hoxha. Por Gjykata e Apelit kërkoi sërisht arrestimin e tij, por deri më sot ai ishte ende në kërkim.

Njoftimi i policisë

Falë bashkëpunimit të Interpol Tiranës, me homologët dhe me agjencitë ligjzbatuese brenda dhe jashtë vendit, kapet një tjetër person i shpallur në kërkim ndërkombëtar, i dënuar për vrasje.

Si rezultat i shkëmbimit të informacionit mes Interpol Tiranës dhe Interpol Wiesbaden, Gjermani, është bërë e mundur kapja dhe arrestimi në Gjermani, me qëllim ekstradimi drejt Shqipërisë, i shtetasit Genc Tafilaj, 43 vjeç, banues në Shkodër.

Ky shtetas ishte shpallur në kërkim ndërkombëtar nga Interpol Tirana, pasi në maj të vitit 2021, Gjykata e Apelit Tiranë ka vendosur kthimin në burg të këtij shtetasi, për të vuajtur dënimin e mbetur prej 6 vitesh, për vrasje.

Shtetasi Genc Tafilaj është dënuar nga Gjykata e Lartë, në vitin 2002, me 25 vjet burgim dhe pasi ka vuajtur një pjesë të dënimit, Gjykata e Rrethit Krujë, në vitin 2017, ka vendosur ta lirojë me kusht.

Më datë 02.08.2000, në Shkodër, shtetasi Genc Tafilaj, në bashkëpunim me babain e tij, ka vrarë me armë zjarri Drejtorin e Drejtorisë së Policisë Shkodër të asaj kohe, Arben Zylyftari.

Interpol Tirana, në bashkëpunim me agjencitë ligjzbatuese, vijon punën për plotësimin e  dokumentacionit, me qëllim ekstradimin e këtij shtetasi në Shqipëri, për të kryer pjesën e mbetur të dënimit.