Me 76 vota pro dhe me 1 abstenim, Kuvendi i Kosovës miratoi rezolutën që i thotë jo mbajtjes së referendumit të Serbisë për ndryshime kushtetuese në fushën e drejtësisë, në territorin e Kosovës.
Kryeministri i Kosovës, Albin Kurti, tha se qëndrimi i institucioneve të vendit është në mbrojtje të kushtetutshmërisë dhe ligjshmërisë.
“Ne nuk do t’i shkelim parimet tona. Praktikat e dëmshme ndryshohen, e ligji do të respektohet. Kosova është shtet sovran dhe i pavarur, ashtu duhet edhe të trajtohet”, tha Kurti.
Ndërkohë, edhe institucionet e Kosovës janë gati ta pengojnë referendumin brenda territorit të tyre.
Ministri i Punëve të Brendshme, Xhelal Sveçla, në një shkrim në “Facebook” paralajmëroi se institucionet s’do të lejojnë që të shkelet rendi kushtetues dhe sovraniteti i vendit.
Teksti i rezolutës
1. Kuvendi si përfaqësues i qytetarëve shpreh qëndrimin e përbashkët se organizimi i referendumit të Serbisë në Kosovë cenon sovranitetin dhe rendin kushtetues të Kosovës dhe është në kundërshtim me Kushtetutën dhe ligjet e Kosovës dhe normat ndërkombëtare.
2. Kuvendi kërkon nga Qeveria dhe institucionet gjegjëse të ndërmerren veprimet për të mos lejuar cenimin e sovranitetin dhe rendin kushtetutës nga mbajtja e referendumit të një shteti të huaj në territorin e Kosovës.
3. Kuvendi thekson përkushtimin e Kosovës për të garantuar dhe mbrojtur të gjitha të drejtat e shtetasve të Kosovës në përputhje me ligjet dhe Kushtetutën.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
