Mbledhja e sotme e Komisionit parlamentar të Integrimit, në të cilën ishte parashikuar një seancë dëgjimore me ministrin e Brendshëm, është anuluar. Burimet bënë të ditur për Temën se mbledhja e parashikuar për në orën 13:00 të ditës së sotme është shtyrë për një moment ende të pacaktuar.
Kjo shtyrje vjen pas ngjarjes së djeshme në aeroportin e Rinasit, ku u grabitën 10 milionë euro, të cilat po transportoheshin jashtë me një avion udhëtarësh të linjës Austrian Airlines.
Ngjarja ndodhi të martën, rreth orës 15:00, teksa vlera monetare ishte duke u ngarkuar në avion, me destinacion Vjenën. Grabitësit janë përplasur me policinë, madje edhe kanë shkëmbyer zjarr. Si pasojë e përplasjes ka mbetur i vrarë njëri prej autorëve, i cili u identifikua sot si Admir Murataj.
Policia ka qenë shumë e kursyer në dhënien e informacionit në lidhje me ngjarjen, e cila mbetet nën hetim. Ministri Sandër Lleshaj reagoi dje vetëm pas një deklarate të nënkryetarit të PD-së, Edi Paloka, në lidhje me ngjarjen.
“Edhe në momentin e një përplasjeje me armë të Policisë së Shtetit me një grup të armatosur kriminal, zëdhënësi/sekretari i një partie antiparlamentare sulmon ..... Policinë!!! Megjithatë të gjithë shqiptarët janë në krah të Policisë së Shtetit në luftën e përbashkët kundër krimit të organizuar. Kjo luftë nuk mund të ndalet nga askush”, shkroi Lleshaj në rrjete sociale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
