10 kundërshtimet e PD-së për Vettingun

PD ka hartuar një material të gjatë sa i përket pikave me të cilat nuk bie dakord me draft/ligjin e OPDAT dhe EURLAIUS, për rivlersimin e gjyqtarëve dhe prokurorëve. Janë gjithsej 10, çështjet që PD nuk bie dakort, duke e nisur që me tekstin e projktligjit, i cili sipas tyre nuk  detajon procedurën e përzgjedhjes dhe emërimit të anëtarëve të organeve të  rivlerësimit.

Ndërsa sa i përket rolit të operacionit të ndërkombëtarëve, PD pretendon se nuk e gjen të pasqyruar mirë në ligj.

“Roli i OMN dhe vëzhguesve ndërkombëtar të jetë në përputhje me nenin B dhe pikën 7 të nenit C të Amendamenteve Kushtetuese, që i koncepton ato si rojtarë që sigurojnë në veçanti transparencë, ndërsa kompetencën vendimmarrëse e lenë në duart e organit të brendshëm”.

Gjithashtu ata kërkojnë dhe rishkimin e rolit të Inspektoratit të Lartë të Kontrollit të Pasurive dhe  Drejtorisë së Sigurisë së Informacionit të Klasifikuar, në mënyrë që procesi i vlerësimit të pasurisë dhe kontrollit të figurës të japë të gjitha garancitë e nevojshme që do të arrihet rezultati i pritshëm. Për këtë Masa e jashtëzakonshme e rivlerësimit duhet të zbatohet ekskluzivisht vetëm nga organet e posaçme të vettingut. Për ekspertët demokratë, ligji i vlerësimit të gjyqtarëve dhe prokurorëve ka paqartësi për rastet e përjashtimit të kandidatëve nga konkurimi, mënyrën dhe arsyet e këtij përjashtimi, si dhe të drejtën e ankimit për përjashtimin.

Një tjetër shqetësim që ngrenë demokratët në leximin e projektligjit të vettingut ka të bëjë me kompetencën e organeve të vettingut që duan të përfshihen në sistemin gjyqësor, duke u përqendruar vetëm tek vlerësimi i përshtatshmërisë së emërimit. Opozita mendon se përfshirja në sistem bëhet nga organet qeverisëse (KLGJ/KLP) dhe duhet të jetë rrethanë përjashtuese, sipas rasteve të përcaktuara nga ligji, si dhe me një proces konkurimi.