Në 27-vjetorin e masakrës së Srebrencisës, Bosnja ka mirëpritur rezolutën e parlamentit të Shqipërisë që dënoi vrasjen e mbi 8 mijë burrave dhe grave myslimanë. Sead Numanoviç, analist dhe gazetar në median e shkruar thotë për MCN se qëndrimi i opozitës shqiptare është për t’u vlerësuar.
‘’Shpresat këtu në Bosnje e Herzegovinë për rezolutën në Shqipëri ishin të larta që kur rezoluta u propozua nga opozita në parlament, por u refuzua nga mazhoranca e Edi Ramës. Më vjen keq ta them, por u zhgënjyem shumë nga vendimi i shumicës së Ramës, por më mirë vonë se kurrë. Për mendimin tim, opozita tregoi seriozitet duke votuar rezolutën e dytë. Lanë mënjanë interesat politike personale kundrejt qeverisë dhe Edi Ramës, prandaj mendoj se kreditet për miratimin e rezolutës shkojnë për opozitën. ‘’, u shpreh Numanoviç.
Por sa i fortë është ndikimi i Rusisë në Bosnjë e Ballkan. Numanoviç thotë se goditjet e para destabilizuese po jepen në Maqedoninë e Veriut e Mal të Zi.
“Nga njëra anë ndikimi i saj forcohet, por nga ana tjetër dobësohet. Kjo lidhet e gjitha me Bashkimin Europian. Në Samitin e fundit, të gjashta vendet u zhgënjyen, sidomos Shqipëria e Maqedonia e Veriut që nuk morën dot dritën jeshile për negociatat. Ju e shihni, në Shkup nisën protestat për propozimin francez, kjo është një mundësi për Rusinë që pa diskutim do e përdorë. Edhe në Mal të Zi, ditët e fundit po shohim një destabilizim që po vjen vetëm nga ndikimi i lartë rus. Brukseli duhet të gjejë një rrugë, pasi në Ballkan besimi ndaj BE është në kuotat më të ulëta historike. Pra, me pak fjalë jemi në duart e Moskës, Brukselit, Londrës, Berlinit dhe Uashingtonit.”, vazhdoi Numanoviç.
Sa i përket Turqisë, Numanoviç nuk sheh asnjë rrezik edhe pse nuk e mohon ndikimin e madh të Erdogan.
“Nuk shoh rrezik nga Turqia ende. Problemi aty është me partinë në pushtet, inflacioni në Turqi është shumë i lartë. Erdogan ka humbur popullaritet. Turqia ka çështjet e veta që duhet ti zgjidhë, prandaj nuk mendoj se është shumë e përqendruar me atë që ndodh në Ballkan, edhe pse është shumë prezente. Por nuk është si Rusia. Rusia ka përfaqësuesit apo kukullat e veta në Ballkan, që punojnë për Putinin vetëm për të destabilizuar rajonin. Dhe ndikimi do të shihet jo vetëm në muajt, por dhe vitet e ardhshme.”, përfundoi Numanoviç.
Për Numanoviç, rajoni i Ballkanit Perëndimor mbetet i rrezikuar, për sa kohë Brukseli nuk i jep zgjidhje vendeve të rajonit, duke i lënë edhe më shumë në një det të hapur ku Rusia mund të përfitojë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
