Harta gjyqësore në Kushtetuese, Hoxha: Duhet të ketë kthim pas, është cenuar aksesi i qytetarëve në drejtësi (VIDEO)

Avokati Arlind Hoxha tha në studion e MCN Live se Gjykata Kushtetuese nuk duhet të lërë në fuqi shkrirjen e 18 gjykatave pasi kjo reformë ka sjellë problematika në të gjithë sistemin gjyqësor.

Duke vijuar më tej, Hoxha shtoi se pas 8 muajve që kur u implementua harta e re gjyqësore, numri i dosjeve stok vetëm është rritur, dhe po ashtu është cenuar aksesi i qytetarëve të drejtësi.

Duhet të ketë kthim pas. Kjo reformë duke qenë se erdhi si pasojë e moskonsultimit me ekspertët e fushës, duhet të kthehet se ka sjellë problematika në sistemin gjyqësor, ku cenohet aksesi i qytetarit në gjykatë, rriten kostot që ka qytetari kundrejt avokatit dhe rrugës që duhet të bëjë, edhe për ne avokatët dhe ngërçin që kanë gjykatat.

Në Gjykatën e Lartë ka 25 mijë dosje stok, në Gjykatën e Apelit ka 36 mijë dosje stok.

Pas 8 muajsh të reformës ky numër vetëm rritet, është cenuar aksesi në drejtësi për qytetarët.

Koston e drejtpërdrejtë e ka qytetari, duke paguar më shumë avokatin, duke paguar dhe transportin që të vijë nga Vlora në Tranë, apo nga Gjirokastra në Tiranë ku aksesi duhet të ishte më i lehtë në vendet respektive. Është rritur dhe kostoja e shtetit, edhe kostot për çështjet penale, për transportin e të burgosurve, ka vonesa që lidhen me oraret e gjyqeve.

Më tej, Hoxha tha se zëri i avokatëve nuk u mor parasysh në implementimin e hartës së re gjyqësore pasi të gjitha vendimet ishin marrë.

Po ashtu Hoxha theksoi se mungesa e aksesit të qytetarëve në drejtësi po sjell një sërë pasojash të tjera.

Avokatët e kundërshtuan hartën e re gjyqësore duke dhënë me argumente pasojat që do sillte. Kjo nuk ishte e mjaftueshme, as protestat, as bojkotimi i gjyqeve. Zëri i avokatëve nuk u mor parasysh në momentin e implementimit, ishin marrë të gjitha vendimet. Ishte vendosur që të implementohej.

Pas 8 muajsh shohim pasojat dhe këto pasoja do të bëjnë Gjykatat Kushtetuese të marrin vendimin që të kthehen pas .

Kjo reformë që ka prekur gjykatat po largon shërbimet dhe mungesa e aksesit në drejtësi po sjell një sërë pasojash. Janë zhvilluar 3 seanca, pritet një vendim brenda 30 ditësh.