Aktualisht po zhvillohet protesta e 29-të radhazi, ku qytetarë kanë marshuar edhe këtë të diel nga sheshi “Skënderbej” drejt Kryeministrisë, duke kërkuar dorëheqjen e kryeministrit Edi Rama.
Protesta, e cila nisi fillimisht nën moton “Shqipëria nuk është në shitje”, në kundërshtim me ndërtimin e një resorti turistik në zonën e mbrojtur të Zvërnecit, është zgjeruar tashmë në një lëvizje më të gjerë kundër sistemit aktual politik.
Protestuesit kanë paraqitur një sërë kërkesash që përfshijnë largimin e kryeministrit, anulimin e ligjit për zonat e mbrojtura, krijimin e një qeverie teknike, si dhe largimin e “kastës së vjetër” politike.
Ndërkohë, më shumë detaje nga situata në terren sjell gazetarja Jonida Cakoni, e cila në një lidhje me MCN TV deklaroi se ka nisur grumbullimi i protestuesve të cilët më pas marshojnë paqësisht drejt kryeministrisë.
Ka nisur mbledhja dhe grumbullimi i qytetarëve, të cilët më pas do të marshojnë drejt Kryeministrisë. Kërkesat mbeten të njëjta, nga anulimi i projektit të resortit deri te dorëheqja e Ramës dhe krijimi i një qeverie teknike.
Prania e tyre ka filluar të rritet dhe në orët në vijim pritet të mblidhen edhe më shumë qytetarë, me rënien e temperaturave. Deri tani nuk është shënuar asnjë incident, njësoj si në ditët e kaluara, ku qytetarët kanë marshuar në rrugët e kryeqytetit në mënyrë paqësore.
Shumica e protestuesve janë optimistë dhe deklarojnë se do të vijojnë protestat deri në dorëheqjen e kryeministrit. Duket sikur ka një rënie të lehtë të pjesëmarrjes, por për shkak dhe të temperaturave në orët e mbrëmjes, protestuesve u bashkohen më shumë qytetarë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
