BE: Prodhimi i qumështit në rrezik në 10 vitet e ardhshme

Në 10 vitet e ardhshme, 13% e fermave të lopëve mund të zhduken në Bashkimin Evropian.

Vitet e fundit kemi parë rritje të rendimentit falë vëmendjes më të madhe ndaj mirëqenies së kafshëve dhe politikave mjedisore. Megjithatë, një tendencë e destinuar të ndryshojë, pasi sipas parashikimeve, prodhimi i qumështit do të ulet me 0.2% në vit deri në vitin 2035.

Faktorë të ndryshëm e bëjnë të pasigurt të ardhmen e sektorit të qumështit, në radhë të parë ndryshimet klimatike dhe mungesa e përkushtimit të të rinjve për bujqësinë.

Kjo është ajo që del nga një analizë e qendrës së studimit të Parlamentit Evropian, “Sektori i qumështit të BE-së: karakteristikat kryesore, sfidat dhe perspektivat”.

Problemi i parë është reduktimi i tufave të bagëtive të qumështit për shkak të ndryshimeve klimatike. Kombinimi i temperaturave të larta dhe lagështisë mund të shkaktojë stres të nxehtësisë tek lopët.

“Ka gjasa që ky të bëhet një problem gjithnjë e më i zakonshëm edhe në rajonet me klimë përgjithësisht të butë”, shpjegojnë analistët e qendrës së studimit.

Me nxehtësinë e tepërt zvogëlohet si prodhimi ashtu edhe përqindja e yndyrës në qumësht.

Tufat e kullotave vuajnë më shumë nga temperaturat e larta sesa lopët në hambarë që mund të kenë hije dhe ambiente për ftohjen e ajrit.

Për shembull, moti shumë i thatë ose shumë i lagësht dhe përmbytjet mund të rrisin rrezikun e antraksit, një sëmundje ngjitëse zoonotike.

Kushtet ekstreme të motit të tilla si thatësirat, valët e të nxehtit dhe përmbytjet, përveçse shkaktojnë më shpesh shpërthime sëmundjesh, mund të kenë një ndikim të rëndësishëm në foragjere.

Aspekti tjetër i cili e vë në krizë prodhimin është mungesa e fuqisë punëtore.

Të rinjtë gjithnjë e më pak tërhiqen nga profesionet që lidhen me prodhimin e qumështit dhe veçanërisht shqetësuese është çështja e ndërrimit të brezave.

Shumë shtete anëtare tregojnë një përqindje jashtëzakonisht të lartë të fermerëve të moshës 65 vjeç e lart, shumë më e lartë se ajo e të rinjve që sapo kanë hyrë në treg.

Marzhet e fitimit të fermerëve janë ende të pasigurta, për shkak të rritjes së ndjeshme të kostove të energjisë dhe plehrave, së bashku me uljen e çmimeve të qumështit të papërpunuar, vazhdimin e një inflacioni të lartë dhe rritjen e normave të interesit.

Së fundi, sipas analistëve, prodhuesit e Bashkimit Evropian kanë më shumë gjasa të rrezikojnë dështimin sepse prodhimi i tyre zakonisht është shumë i specializuar në një lloj ushqimi.

Kjo i bën fermerët më të prekshëm ndaj goditjeve të të ardhurave nëse fitimi nga ai produkt do të shembet.