Përmbaruesit privatë kanë hedhur në gjyq ministren e Drejtësisë, Etilda Gjonaj. Më anë të një padie të depozituar në Gjykatën Administrative, përmbaruesit kërkojnë anulimin e urdhrit nr. 190, datë 20 qershor 2020, lëshuar nga ministrja Gjonaj.
Me anë të këtij urdhri, për rifreskimin e dosjeve të tyre, Ministria e Drejtësisë u kërkon përmbaruesve privatë: 2 fotografi, ID, formular vetëdeklarimi, formular vetëdeklarimi të gjendjes gjyqësore, formular vetëdeklarimi për fillimin e punës, masat e dhëna ndaj tyre në vite.
Por sipas tyre, këto kërkesa bien në kundërshtim me ligjet në fuqi. Dhoma Kombëtare e Përmbaruesve thotë se Ministria e Drejtësisë nuk është konsultuar me ta për listën e dokumentave që duhen dorëzuar për efekt rifreskim dosjesh.
Verifikimi i përmbaruesve është një proces i ngjashëm me vetingun. Por për ta, neni 88/7 i ligjit 26/2019 për shërbimin e përmbaruesve privat nuk ka autorizuar ministrinë të kryejë vettingun e tyre nëpërmjet formularëve të vetdeklarimit, por ka autorizuar përditësimin e të dhënave personale të çdo përmbaruesi.
Ata thonë se Ministria e Drejtësisë, e cila licencon përmbaruesit, duhej t’i kishte prej 10 vitesh këto të dhëna.
Kërkesën e ministrisë për të depozituar CV e formimit të tyre arsimor e profesional si dhe librezën e punës për punësimin përpara se të licencoheshin si përmbarues, ata e shohin si përvetësim të të dhënave personale.
Gjykata Administrative ka marrë në shqyrtim këtë padi dhe më 27.7.2020 ka shpallur moskompetencë. Tashmë, ajo i ka kaluar për shqyrtim Apelit Administrativ.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
