Këshilli i Lartë i Prokurorisë, ka emëruar sot si prokurore në Prokurorinë e Posaçme të Anti Korrupsionit Manjola Kajana. Ky vendim u mor në mbledhjen 'online' në praninë e të gjithë anëtarëve të Këshillit dhe përfaqësueseve nga Ministria e Drejtësisë, EURALIUS, OPDAT si dhe vëzhguese tё tjerë tё akredituar.
"Pasi ka verifikuar plotësimin e të gjitha kushteve dhe kritereve të parashikuar në ligjin 'Për organizimin dhe funksionimin e institucioneve për të luftuar korrupsionin dhe krimin e organizuar', në referencë të vendimit të tij, nr.137 datë 16.07.2019 'Për miratimin e listës me renditjen e kandidatëve për prokurorë në Prokurorinë e Posaçme', si dhe të Vendimit të KPA-së, datë 10 korrik 2020, për lënien në fuqi të vendimit nr.162 datë 19.06.2019 të KPK-së 'Për konfirmimin në detyrë të subjektit të rivlerësimit znj. Manjola Kajana',"-thuhet në njoftimin e Këshillit të Lartë të Prokurorisë.
Deri në emërimin e KLP prokuroria Manjola Kajana kaloi dy shkallët e vetingut.
Ditën e nesërme, e martë 14 korrik 2020, pritet të zhvillohet edhe ceremonia e betimit përpara presidentit Meta.
Bashkë me Kajanën, SPAK ka tashmë 13 prokurorë, ndërkohë që mbeten bosh edhe dy vende. Kandidatë për dy vendet e mbetura vakante për SPAK janë Elisabeta Imeraj dhe Anton Martini.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
