Stacionet e autobusëve në Tiranë janë mbushur me qytetarë që presin për të udhëtuar, ndërsa mjetet e transportit urban shfaqen të tejmbushura, duke vështirësuar lëvizjen normale në kryeqytet.
Kjo situatë vjen pas vendimit të shpallur nga Shoqata Kombëtare e Transportit Qytetas dhe Shoqata e Transportit Urban dhe Interurban, sipas të cilit nga sot flota e autobusëve të shërbimit publik do të reduktohet me 40%.
Shoqatat kanë argumentuar se ky hap është marrë si pasojë e rritjes së çmimit të naftës dhe mungesës së masave nga ana e qeverisë për subvencionimin e sektorit.
Pamjet nga terreni tregojnë se vendimi ka hyrë menjëherë në fuqi: qytetarë të shumtë presin në radhë të gjata në stacione, ndërsa autobusët që qarkullojnë janë të mbingarkuar, duke krijuar vonesa dhe vështirësi për të arritur në destinacionet e tyre.
Qytetarët shprehen të shqetësuar për situatën, duke kërkuar zgjidhje të shpejtë, ndërsa operatorët e transportit paralajmërojnë se pa ndërhyrje konkrete, situata mund të përkeqësohet edhe më tej në ditët në vijim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
