Presidenti Bajram Begaj ka nisur ditën e sotme konsultimet me përfaqësuesit e partive politike, për të caktuar datën e zgjedhjeve, ku ka pritur në takim drejtuesit e partive të vogla.
Gazetari Mariglen Kume raportoi për MCN Live, se Presidenti ka 9 muaj afat para përfundimit të mandatit të legjislaturës aktuale për caktimin e datës së zgjedhjeve.
Presidenti sipas një praktike të mirë nis konsultimet me subjektet partiake për të vendosur datën e zgjedhjeve.
Ditën e sotme po zhvillon takim në zyrën e tij me partitë e vogla, kreun e republikanëve Fatmir Mediu, Agron Dukën, Vangjel Dulen dhe Dashamir Shehin.
Pritet që dhe Shpëtim Idrizi të marrë pjesë në diskutim, për të diskutuar me kreun e shtetit për datën e zgjedhjeve.
Ndërkohë nesër do të jetë takimi me përfaqësues të Partisë së Lirisë dhe ditën e hënë me përfaqësuesit e Partisë Socialiste dhe Partisë Demokratike për të vendosur më pas datën e zgjedhjeve.
Data e zgjedhjeve përkon mes dy afateve, 15 prill me 15 maj dhe midis 15 shtatorit dhe 15 tetorit.
Nga burimet e mia, data e preferuar nga Partia Socialiste është 11 maji i vitit të ardhshëm, por mbetet për tu parë nëse do të ketë dakordësinë e partive të vogla.
Partia e Lirisë në konsultime do të përfaqësohet nga Tedi Blushi, ndërsa nga Partia Demokratike, pritet të jetë Oerd Bylykbashi, nënkryetari i PD për të diskutuar pasi të jetë konsultuar me kryetarin e partisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
