Memorandumi i Mirëkuptimit i nënshkruar midis Turqisë dhe qeverisë libiane të Tripolit, muajin e kaluar, lidhur me kufijtë detarë "është kërcënim për stabilitetin rajonal".
Ky është qëndrimi i qeverisë greke, i bërë publik përmes zëdhënësit Stelios Petsas, gjatë një konference shtypi. Lajmin e bën të ditur “Ekathimerini”.
Greqia ka dërguar dy letra në OKB, të cilës i ka kërkuar të ndërhyjë. Qeveria greke e cilëson marrëveshjen turko-libiane si një përpjekje për të zgjeruar të drejtat e shpimit turk në Mesdheun lindor.
“Marrëveshja shkel Ligjin e Detit. Zona detare e Turqisë dhe ajo e Libisë nuk takohen dhe këto dy vende nuk kanë kufi detar të përbashkët”, ka thënë Petsas.
Momarrëveshjet për rezervat e gazit në Mesdheun Lindor në det të hapur kanë ardhur duke u rritur mes vendeve të rajonit, të cilat kanë pretendimet e tyre.
Turqia ka pasur një mosmarrëveshje afatgjatë me Qipron mbi rezervat që i takojnë këtij ishulli.
Marrëveshja e Ankarasë me Tripolin përcakton një korridor detar mes zonave të kufijve ujorë në pikat më të afërta midis Libisë dhe Turqisë, duke hapur potencialisht rrugën për kërkimin e naftës dhe gazit atje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
