I akuzuari kroat për krime lufte në Bosnje, Sllobodan Pralak, ka vdekur në një spital të Hagës, pasi ka pirë një lëng në sallën e Gjykatës Ndërkombëtare për Krime Lufte në ish-Jugosllavi, konfirmoi zëdhënësi i Tribunalit, Nenad Gollçevski.
"Autoritetet holandeze kanë filluar hetimet mbi vdekjen e Pralakut", tha ai.
Pralak, ish-komandant i forcave kroate të Bosnjës gjatë luftës së viteve 1992-95, ka marrë pijen dhe ka bërtitur "nuk jam kriminel", vetëm pak kohë pasi Gjykata e Hagës ka konfirmuar dënimin e tij me 20 vjet burgim.
"Gjykatës, Sllobodan Pralak nuk është kriminel lufte. E refuzoj vendimin tuaj", ka thënë Pralak.
“Ajo çfarë kam pirë, është helm”, ka thënë ai.
Pralak është dënuar fillimisht në vitin 2013 për krime lufte në Mostar.
Gjykata e Hagës ka konfirmuar të mërkurën dënimin për Pralakun dhe pesë kroatë të tjerë të Bosnjës.
Javën e kaluar, Gjykata e Hagës ka dënuar me burgim të përjetshëm Ratko Mlladiqin – ish-komandant i forcave serbe të Bosnjës.
Kjo gjykatë do t'i mbyllë dyert në fund të këtij viti. / REL /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
