105 vjet nga përfundimi i Luftës së Vlorës

Sot shënohen 105 vjet nga përfundimi i Luftës së Vlorës.

Lufta e Vlorës filloi më 5 qershor 1920 dhe përfundoi më 3 shtator të të njëjtit vit, duke shënuar largimin e ushtrisë italiane dhe një fitore të madhe për Shqipërinë, e cila sapo kishte dalë nga Lufta e Parë Botërore.

Kjo luftë përbënte një seri betejash të zhvilluara nga patriotët shqiptarë kundër forcave ushtarake italiane, të cilat, që nga 9 dhjetori 1919, kishin marrë Shqipërinë nën protektorat, sipas vendimeve të dala nga Konferenca e Paqes.

Në shenjë revolte kundër okupimit italian, më 29 janar 1920 u formua "Komiteti i Mbrojtjes Kombëtare të Vlorës". Sulmi kundër garnizonit italian filloi më 6 qershor 1920.

Në këto luftime morën pjesë rreth 20.000 trupa. Sulmet u zhvilluan në disa lokalitete: në gjirin e Vlorës, në Ujin e Ftohtë, në Vlorë-Kaninë, në Panaja, në Llogora, në Himarë, në Selenicë, në Gjorm, në Matohasanaj dhe në Tepelenë.

Lufta zgjati tre muaj dhe ishte një lëvizje e madhe për të mbrojtur qytetin e Vlorës nga copëtimi total që do i bënin pushtuesit italianë.

Më 3 shtator 1920 pas shumë luftimeve të pabarabarta forcat shqiptare hynë fitimtare në qytetin e Vlorës duke i detyruar pushtuesit italianë të largoheshin, jo vetëm nga rrethi i saj por edhe nga Saranda, Durrësi dhe Shëngjini.