Në Zululandin e sotëm ishin të ftuar Berat Buzhala, gazetar, dhe Dastid Pallaska, avokat, që të dy nga Prishtina. Dhe u fol për debatin që ka shpërthyer pas vizitës së kryeministrit Rama në Serbi, që ka nxjerrë në dukje një ndarje të fortë mes një numri gazetarësh të Tiranës e një numri gazetarësh të Prishtinës. Të parët janë vënë në mbrojtje të vizitës së Ramës, e të mesazheve që ai ka përcjellë në Serbi, ndërsa të dytët e akuzojnë Ramën se po anashkalon faktorin kosovar dhe në këtë mënyrë po i jep ndihmë Vuçiçit.
Biseda mes të treve u bë e gjallë dhe me përplasje mendimesh, sidomos kur u fol për qëndrimin ndaj faktit që Rama ka ilustruar një ide të vetën duke iu referuar Ivo Andriçit, shkrimtar i famshëm, e në të njëjtën kohë diplomat serbomadh e antishqiptar. Nano deklaroi se në këtë mes nuk ka asgjë të keqe, dhe se edhe ai e pëlqen Ivo Andriçin si shkrimtar, madje mendon se është një shkrimtar i madh. Ai vijoi duke u thënë të ftuarëve se "kosovarët duhet ta kuptojnë këtë qasje jo nacionaliste të shqiptarëve të Shqipërisë, të cilët s'e kanë patur për gjë gjatë gjithë kohës të dëgjojnë e t'i shijojnë këngët sllave e ato greke, pavarësisht gjendjes së marrëdhënieve të Shqipërisë e shqiptarëve me këto vende në një moment të caktuar". Por të ftuarit këmbëngulën se për shqiptarët e Kosovës kjo është e papranueshme. Ata ripërsëritën idenë se referenca që Rama i bëri Andriçit ishte e gabuar, dhe fyese për Kosovën. "Rama nuk e ka idenë e historisë së marrëdhënieve Serbi-Kosovë", u shprehën ata, dhe kjo është një nga arsyet që ai bën gabime të tilla.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
