Sot zhvillohet raundi i parë për kreun e shtetit pa asnjë emër të propozuar

Mazhoranca dhe opozita do të mblidhen sot në seancën e parë të Parlamentit për Presidentin e ri të vendit, porse pa asnjë propozim.

Kjo ka ardhur pasi dje asnjë kandidat nuk është regjistruar deri në orën 16:00, kur ishte edhe afati i fundit i përcaktuar nga mbledhja e Kolegjit të Kryetarëve.

Mirëpo sot pritet që në orën 09:00 të mblidhet Komisioni i Ligjeve për të shqyrtimin e kandidaturave për zgjedhjen e presidentit të ri, ndërsa në orën 17: 00 do të zhvillohet edhe seanca plenare për raundin e parë të votimit.

Socialistët deri më sot nuk kanë zbuluar asnjë emër për kandidaturën për presidentin e vendit.

 Konferenca e Kryetarëve është e detyruar të mblidhet për të vendosur datën se kur do të zhvillohet raundi i dytë i votimit për zgjedhjen e Presidentit të Republikës.

Në Kushtetutë thuhet se në 3 raundet e para të votimit duhet që kandidati të marrë të paktën 84 vota për t’u zgjedhur në krye të shtetit, ndërsa në raundin e 4 dhe 5 mjafton shumica e deputetëve të Parlamentit, 71 vota.