Nuk mori masa për "Akulloret"/ KLSH padit drejtorin e Përgjithshëm të AKU-së

Kontrolli i Lartë i Shtetit ka depozituar në Prokurorinë e Tiranës në padi ndaj drejtorit të Përgjithshëm të AKU, Bledar Skënderi, për akuzën “shpërdorim detyre”.

“Duke marrë shkas nga disa nga problematika e trajtuar në disa media, për t’iu përgjigjur ndjeshmërisë së publikut dhe informimit të tij për çështjet që lidhen me garantimin e sigurisë ushqimore, veçanërisht me praninë e substancës “oksid etileni” në prodhimin e produktit ‘Akullore’ (, deri në inspektimin, bllokimin, tërheqjen nga tregu dhe asgjësimin e saj”, thuhet në kallëzim.

Nga hetimi i kryer, KLSH thotë se drejtori i AKU-së nuk ka marrë asnjë veprim ndaj kësaj çështje.

Njoftimi i plotë:

Kontrolli i Lartë i Shtetit, duke marrë shkas nga problematika e trajtuar në disa media, për t’iu përgjigjur ndjeshmërisë së publikut dhe informimit të tij për çështjet që lidhen me garantimin e sigurisë ushqimore, ushtroi jashtë programit vjetor të miratuar, auditimin tematik në Drejtorinë e Përgjithshme të Autoritetit Kombëtar të Ushqimit me objekt: ”Mbi procedurën e ndjekur nga DPAKU nga marrja e njoftimit nëpërmjet sistemit RASFF (sistemi i njoftimit të shpejtë për ushqimin e popullatës dhe ushqimin për kafshë) për përdorimin e paautorizuar të substancës “oksid etileni” në prodhimin e produktit “Akullore” (importuar dhe tregtuar në tregun shqiptar), deri në inspektimin, bllokimin, tërheqjen nga tregu dhe asgjësimin e saj”.

Nga auditimi i ushtruar, Kontrolli i Lartë i Shtetit ka evidentuar mosveprime të Drejtorit të Drejtorisë së Përgjithshme të Autoritetit Kombëtar të Ushqimit, të cilat janë në kundërshtim flagrant me ligjin dhe aktet nënligjore që rregullojnë veprimtarinë e institucionit të drejtuar prej tij. Për mosveprimet e Drejtorit të DPAKU, KLSH ka depozituar kallëzimin penal në Prokurorinë pranë Gjykatës së Shkallës së Parë Tiranë, për veprën penale “Shpërdorim detyre”, parashikuar në nenin 248 të Kodit Penal.