Kontrolli i trafikut ajror nuk ishte në kushte normale në momentin e përplasjes ajrore midis një helikopteri ushtarak dhe një avioni pasagjerësh në Uashington, DC, që shkaktoi vdekjen e 67 personave, ka pranuar Ministri i Transportit në ShBA, Sean Duffy.
Mediat amerikane raportuan se në kullën e kontrollit të Aeroportit Kombëtar Reagan kishte mungesë stafi në momentin e aksidentit të së mërkurës, sipas një raporti qeveritar.
Dy burime i thanë CBS News se një punonjës i kontrollit të trafikut ajror ishte duke menaxhuar njëkohësisht helikopterët dhe disa avionë nga aeroporti, një detyrë që normalisht kryhet nga dy persona.
“I besoj Administratës Federale të Aviacionit (FAA) kur thotë se situata nuk ishte normale,” u shpreh Duffy kur u pyet për këto raportime.
Anëtari i Bordit të Këshillit Kombëtar të Sigurisë në Transport (NTSB), Todd Inman, tha se të dhënat paraprake tregojnë se helikopteri po fluturonte në një lartësi prej rreth 200 këmbësh (60 metra), raportoi CBS. Kufiri maksimal i lejuar për helikopterët në zonën pranë Aeroportit Kombëtar Reagan është 200 këmbë.
Duffy gjithashtu vuri në dyshim orarin e këtij fluturimi.
Hetuesit po shqyrtojnë disa faktorë, përfshirë lartësinë e fluturimit, për të përcaktuar shkakun e përplasjes, por ende nuk kanë dalë në një përfundim përfundimtar, deklaruan zyrtarët e NTSB.
Në avionin e kompanisë American Airlines ndodheshin 64 pasagjerë kur ai u përplas në ajër me një helikopter Black Hawk të ushtrisë amerikane, në bord të cilit ishin tre ushtarë.
Të dielën në mëngjes, dhjetëra familjarë të viktimave u mblodhën në vendin e aksidentit. Ata mbërritën me autobusë të posaçëm, të shoqëruar nga policia, duke vizituar fillimisht skenën e përplasjes dhe më pas një pistë ku avioni ishte planifikuar të ulej.
Duffy tha se SHBA përballet prej kohësh me një mungesë kronike të kontrollorëve të trafikut ajror.
Mediat amerikane raportojnë se mbi 90% e qendrave të kontrollit të trafikut ajror në vend funksionojnë me staf nën nivelet e rekomanduara nga FAA.
Ministri i ri i Transportit tha se po punon me FAA për të trajnuar kontrollorë të rinj dhe se ka një plan për të zgjidhur këtë problem. Megjithatë, ai theksoi se kjo nuk është diçka që mund të ndryshojë brenda ditës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
