Policia e Shtetit vijon operacionin ndërkombëtar të koduar “The Wanted”, me qëllim lokalizimin, kapjen dhe finalizimin e procedurave të ekstradimit të shtetasve të shpallur në kërkim ndërkombëtar.
Në kuadër të bashkëpunimit të ngushtë me partnerët ndërkombëtarë, gjatë ditës së sotme pritet të finalizohet ekstradimi nga Dubai, Emiratet e Bashkuara Arabe, drejt Shqipërisë, i shtetasit të shumëkërkuar Durim Bami, 47 vjeç, banues në Nikël, Krujë.
Sipas autoriteteve, Gjykata e Posaçme e Shkallës së Parë Kundër Korrupsionit dhe Krimit të Organizuar, me vendim të datës 15.05.2024, i ka caktuar këtij shtetasi masën e sigurisë “Arrest në burg”, për veprat penale “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale, ose grup i strukturuar kriminal”.
Pas mbërritjes së tij në vend, autoritetet kanë bërë me dije se do të ketë një njoftim të plotë për median lidhur me detajet e operacionit dhe procedurat e mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
