Komisioni Parlamentar për Reformën Zgjedhore ka thirrur një mbledhje për ditën e sotme, ku ka ftuar edhe përfaqësues të Partisë Demokratike.
Në rend të ditës për diskutim është ecuria e agjendës së punës dhe konkluzionet e tryezës së organizuar nga OSBE në 5 shtator me pjesëmarrjen e gjithë faktorëve përfshirë dhe ata politik.
Përfaqësuesit e mazhorancës janë kujdesur ti lënë detyrë sekretariatit që për mbledhjen të njoftohen edhe përfaqësuesit e opozitës jo parlamentare, të cilëve pas djegies së mandateve, vendi ju rezervua vetëm si vëzhgues.
Por Partia Demokratike dhe aleatët e saj, nuk e marrin në konsideratë ftesën duke e refuzuar dhe mos njohur këtë organ parlamentar.
Zyrtarët e PD, thanë se opozita e ka bërë publik platformën për reformën zgjedhore, duke theksuar se vetëm me pranimin e saj Partia Demokratike dhe aleatët e saj do të behën pjesë.
Ndërsa, teksa po futej në Kryesinë e Kuvendit, Damian Gjiknuri, kryetar i Komisionit për Reformën Zgjedhore, nuk dha detaje për gazetarët, por u shpreh shkurt se PD nuk ka sjellë propozime lidhur me Reformën.
Kjo deklaratë e Gjiknurit vjen një ditë pas ftesës së këtij të fundit për Ivi Ksson, që të merrte pjesë në mbledhjen e sotme.
Ndërkohë, kjo ftesë u hodh poshtë nga Sekretari i PD, Gazmen Bardhi i cili u shpreh se duhet të shikohen pesë pikat që opozita ka dërguar, e cila kërkon që të bëhen bisedime mes përfaqësuesve ndërkombëtarë, opozitës së bashkuar dhe qeverisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
