Lufta Rusi-Ukrainë, artistja 76-vjeçare “përballet” me Putinin

Në apartamentin e saj të vogël në Shën Petersburg, artistja 76-vjeçare Elena Osipova më tregon pankartat kundër luftës që ajo ka bërë.

Në njërën ajo ka shkruar: "Putini është lufta. Ne nuk duam të vdesim për Putinin."

Një tjetër presidenti i Rusisë është vizatuar si djall, me brirët e Satanait.

Elena më thotë se pasi Rusia sulmoi Ukrainën, ishte aq e tronditur sa nuk hëngri për tre ditë. Më pas, e mbushur me zemërim, ajo doli në rrugë për të protestuar.

Një turmë e vogël e kishte duartrokitur: ata kishin brohoritur "Jo luftë!"

Më pas dy oficerë policie e morën nga krahët pensionisten dhe e larguan.

Policia ende nuk i ka kthyer asnjë nga pankartat e saj. Ajo më thotë: "Më kishin dhënë disa tulipanë të kuq, lule të reja të bukura. Por shumë shpejt atu u vyshkën. Më kujtuan të rinjtë që binin në varret e tyre.

Kështu që unë kisha bërë një poster dhe shkruaja se njerëzit po dërgoheshin drejt vdekjes. Dhe në një tjetër pankartë u bëja thirrje ushtarëve rusë: "Lërini armët dhe do të bëheni heronj".

Në të gjithë qytetin, një grup për të drejtat e njeriut, Nënat e Ushtarëve të Shën Petersburgut, funksionon një linjë telefonike ku prindërit thërrasin, të shqetësuar për djemtë e tyre të rekrutuar, disa prej të cilëve tashmë janë duke luftuar në Ukrainë.

Shumë prej tyre kërkojnë me dëshpërim ndihmë për të sjellë djemtë e tyre në shtëpi. Ka pasur shumë thirrje - por ka edhe shumë presion nga lart. Olga nga grupi më thotë se po detyrohet të mbyllet.

"Autoritetet preferojnë t'i mbulojnë gjërat, t'i japin shoqërisë një pamje të rreme se gjithçka është në rregull në ushtri. Ata duan që nënat e ushtarëve të jenë të duruara dhe të heshtin."

Por në Shën Petersburg dhe në të gjithë Rusinë, autoritetet po përpiqen të mbledhin mbështetje për atë që ushtria ruse po bën në Ukrainë.

Departamenti i shtypit i Policisë së Shën Petersburgut ka qenë i zënë. Ata kanë bërë një sërë videosh të shkëlqyeshme, të kompletuara me kolonë zanore mbresëlënëse, për të treguar mbështetjen për forcat ruse në Ukrainë.

Jashtë muzeut me famë botërore Hermitage, ndalem për të folur me Nadezhdën, e cila është jashtë për një shëtitje. Ajo më thotë: "Unë e dua atdheun tim dhe i besoj presidentit tim, dhe nëse mendon se Perëndimi mund të na frikësojë duke mos mbajtur mallra, e ka gabim. Rusët nuk kanë frikë nga të ftohtit apo uria."

Por në banesën e saj, artistja Elena Osipova thotë se nuk do të pranojë kurrë që ajo që po bën rusët në Ukrainë është e drejtë.

"Kjo që po ndodh është një turp. Kaq shumë njerëz po vriten. Autoritetet po përpiqen të ngjallin ndjenja patriotike në opinion. Por e gjitha është një mashtrim. Dhe shumë janë mashtruar nga propaganda që ka vazhduar me vite dhe që ka ndryshuar njerëzit. Është e tmerrshme."

Në vitet e fundit, rusët kanë njohur shumë luftëra.

Lufta sovjetike në Afganistan, dy luftëra në Çeçeni, përfshirja e ushtrisë ruse në luftën në Siri. Dhe tani Ukraina. Kremlini këmbëngul se trupat e tij atje po kryejnë një operacion special ushtarak. Por shumica e botës e quan atë luftë të Rusisë.