Presidenti i Komisionit Europian, Jean-Claude Juncker, do të mbajë një fjalim më 4 maj në Trier, për të festuar 200-vjetorin e lindjes së Karl Marksit, në qytetin gjerman.
Juncker është ftuar në Trier në cilësinë e qytetarit të nderit.
“Askush nuk mund ta mohojë se Karl Marksi ishte figura që i dha formë historisë në një mënyrë apo në një tjetër. Të mos flasësh për të do të thotë të mohosh historinë”, tha të premten një zëdhënës i Komisionit.
Juncker pritet të zbulojë statujën e Marksit gjatë ceremonisë përkujtimore. Statuja është financuar nga qeveria kineze.
Shumë e shohin pjesëmarrjen e Juncker-it në këtë ceremoni si injorim i 100 milionë viktimave të komunizmit. Planet për ceremoninë përkujtimore kanë shkaktuar zemërim në Britani dhe Europë, veçanërisht në pjesën lindore të kontinentit të vjetër, ku diktaturat komuniste kanë vrarë e burgosur miliona njerëz.
Kritikët e BE-së thonë se “mungesa e përgjegjësisë demokratike dhe dëshira e BE-së për centralizimin e pushtetit në një komision që nuk është zgjedhur me votë, mund të krahasohet me Bashkimin Sovjetik të dikurshëm dhe ish-liderin e tij, Mikhail Gorbaçov”.
Një deputet i Tory-t në Britani, Daniel Kazinski, i cili është arratisur nga regjimi komunist polak bashkë me familjen kur ishte vetëm 7 vjeç, kërkoi që Juncker të refuzojë ftesën dhe të mos bëhet pjesë e ceremonisë përkujtimore.
“Marksizmi çoi në vrasjen e miliona njerëzve nëpër botë dhe u bëri të mundur një bande të vogël fanatikësh të shtypin popujt. Ne duhet që mësime të marra në atë periudhë t’i ndajmë sot me fëmijët tanë”, tha ai. / Përgatiti: Gazmira Sokoli /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
