Veliaj reagon pas vendimit: Nuk ishte ai që prisja, por humbjet na bëjnë më të fortë

<p>Kryebashkiaku Erion Veliaj, ka reaguar me anë të një postimi në lidhje me vendimin e GJKKO, e cila hodhi sot poshtë kërkesën e tij për ndryshimin e masës së sigurisë. Veliaj thotë se bisedat e tij me të shoqen dhe të vëllain, pasi arrestimit, janë përdorur si prova shtesë. Veliaj shton se do ta vijojë betejën për drejtësi.</p> <p class="rteindent1"><em>Të dashur miq e dashamirës,</em></p> <p class="rteindent1"><em>Vendimi i sotëm nuk ishte ai që do të doja, po ishte ai që deshën ata që më janë qepur si të isha armiku më i betuar i këtij vendi.</em></p> <p class="rteindent1"><em>Do të kisha dashur shumë që ta kisha fituar këtë betejë dhe tani të isha duke përqafuar djalin tim, për të cilin më ka marrë shumë malli!</em></p> <p class="rteindent1"><em>Por, këta më ngritën edhe një kurth, duke më vënë në përgjim bisedat me gruan e me vëllain nga burgu, dhe shfrimet e mia i kthyen në një dosje të re!</em></p> <p class="rteindent1"><em>E gjitha është si një ëndërr e keqe, si një film sovjetik, me sigurimsa që i qepen robit deri në poshtërim. Po ja që s’është as ëndërr, as film, po është një ngjarje e jetuar në lëkurën e një familjeje për fustanet imagjinare të gruas dhe dosje të stisura qëllimisht për Kryetarin e Bashkisë së Kryeqytetit.</em></p> <p class="rteindent1"><em>A ka diku dikush që duhet të dëgjojë e të shohë se çfarë lebetie është e gjithë kjo?! Avokati amerikan, që më siguroi im vëlla, nuk arrinte të kuptonte asgjë, pasi më dëgjonte dhe pyeste: “Dakord, po pse në burg pa gjyq?”. I kam shkruar Inspektorit të Lartë të Drejtësisë, por po më duket sikur kam hedhur në det një letër në shishe, që kushedi se në ç’breg të shkretë ka dalë.</em></p> <p class="rteindent1"><em>Sidoqoftë, ky nuk është fundi dhe s’ka se si të jetë! Luftën për drejtësi do ta vazhdoj e do ta bëj deri në fund, siç ju’a kam premtuar. Sepse gjatë gjithë jetës sime kam treguar se di të ringrihem. Humbjet na bëjnë më të fortë dhe janë preludi i fitoreve.</em></p> <p class="rteindent1"><em>Uroj të mos bezdis asnjeri nga ju, sidoqoftë me këtë absurdin që po jetoj unë dhe familja ime. Por, kjo është realisht çnjerëzore.</em></p> <p class="rteindent1"><em>Faleminderit për çdo mesazh inkurajues e për çdo mbështetje zemre.</em></p> <p class="rteindent1"><em>Ju përqafoj të gjithëve!</em></p>