Shembet skela në një kantier ndërtimi në Hamburg, të paktën 3 persona të vdekur

Të paktën tre punëtorë kanë vdekur pasi skela u shemb në një kantier ndërtimi në qytetin gjerman të Hamburgut, sipas zyrtarëve.

Të tjerë janë plagosur, duke përfshirë të paktën një person i cili është në gjendje kritike.

Incidenti ndodhi të hënën në mëngjes në Uberseequartier në lagjen HafenCity, një nga kantieret më të mëdha të ndërtimit në qytet.

Skela u shemb nga kati i tetë poshtë në një bosht ashensori. Një numër i panjohur njerëzish janë ende të zhdukur, mendohet se janë varrosur nën rrënoja.

Departamenti i zjarrfikësve fillimisht tha se pesë persona kishin humbur jetën, por tani ata e kanë rishikuar këtë numër.

Sipas mediave gjermane, dhjetëra personel të shërbimit të urgjencës ndodhen në vendngjarje, e cila është evakuuar.

"Aktualisht një operacion shumë i vështirë teknik i shpëtimit nga ekipet e shpëtimit të zjarrfikësve është duke u zhvilluar," tha Philipp Baumann, një zëdhënës i Departamentit të Zjarrfikësve të Hamburgut, për transmetuesin gjerman ZDF. “Shërbimi i zjarrfikësve është duke punuar”.

Qindra njerëz janë aktualisht të punësuar në kantierin e ndërtimit, pjesë e një rizhvillimi të madh që përmban zyra, shtëpi, hotele dhe dyqane.