Nga murgeshë, në kumarxhie

Një ish murgeshë ka pranuar, se ka përvetësuar 835 mijë dollarë përgjatë 10 viteve nga një shkollë katolike në Kaliforni për të financuar vesin e saj, bixhozin.

Autoritetet bënë të ditur, se motra Mary Margaret Kreuper, 70 vjeç, ish drejtoresha e shkollës St James, përdorte tarifat e shkollimit dhe donacionet për të financuar shpenzimet në kazino dhe pagesat e kartave të kreditit. 

Ajo u betua si murgeshë në moshën 18 vjeçare dhe kaloi 59 vite të jetës së saj në urdhrin fetar. Kreuper tregoi, se kishte filluar të transferonte para nga llogaritë e shkollës drejt një llogarie kursimesh, e cila përdorej për të financuar shpenzimet e jetesës së murgeshave, të cilat punonin për shkollën. Më pas ajo filloi ta përdorte llogarinë për qëllime personale. 

Ajo gjithashtu ka pranuar, se ka falsifikuar raportet vjetore për administratën e shkollës, për të mbuluar sjelljen e saj të pahijshme dhe për t'i bindur ata se gjithçka shkonte mirë me financat, në mënyrë që të vazhdonte të kishte kontrollin e llogarive bankare. 

Avokati i saj tha për gazetën The Washington Post, se ajo ishte shumë e penduar dhe i vinte keq për dëmin e shkaktuar. Kreuter mori përgjegjësi të plotë për veprat e kryera dhe bashkëpunoi plotësisht me autoritetet. Në deklaratën e avokatit thuhej gjithashtu, se ajo vuante nga një sëmundje mendore, që i kishte turbulluar gjykimin. 

Skema e mashtrimit u zbulua gjatë një kontrolli financiar në 2018, pasi Kreuper kishte dalë në pension. Ajo kishte instruktuar edhe personelin e shkollës, për ndryshimin dhe shkatërrimin e të dhënave. Ish murgesha rrezikon të dënohet me deri në 40 vite burg./The Guardian/