Kryetari i Bashkisë Gjirokastër Flamur Golemi në një lidhje Live në edicionin e lajmeve në Mcn Tv bëri me dije se 15 familje janë të izoluara në Gjirokastër, ndërkohë që janë evakuuar 5 të tjera.
Po ashtu bëhet me dije se 4 fshatra janë bllokuar në njësitë administrative Antigone dhe Lunxhëri. Një tjetër problematikë që po ndiqet, bën me dije ai, është rrëshqitja e një masivi të madh mali mbi fshatin Mingul.
“Situata është më e qetë në pjesën e qytetit, tashmë më e keqja ka kaluar. Qyteti i është kthyer normalitetit. Problematikë ngelet njësia administrative Antigone, dhe Lunxhëri. Kemi 4 fshatra të bllokuar, por besoj që brenda ditës 3 fshatra do zhbllokohen. Një masiv shumë i madh mali ka rrëshqitur mbi fshatin Mingul, për momentin s’është afër fshatit, por po e ndjekim me specialistët. Kemi tre banesa të dëmtuara si pasojë e rrëshqitjeve në fshatin Labovë e Zhabës. Janë zhvendosur 3 familjet, kemi 2 familje në Bashkinë e Gjirokastrës. Për tre banesa është vendosur shiriti dhe do shikohet zhvendosja totale e tyre. Në Gjirokastër janë 15 familje të izoluara, pasi ndërtimet janë bërë në krah të përroit, dhe gjithë masivi prej 2 mijë tonësh inertesh kanë zbritur nga kjo anë dhe këto familje janë zënë në çark dhe s’kanë mundësi komunikimi”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
