Një raport i Transparency International dhe Institutit për Demokraci dhe Ndërmjetësim, i cili u publikua sot, konkludon se të paktën 9 ligje të miratuara nga Parlamenti shqiptar janë ndikuar nga grupe interesi dhe klienteliste. I ftuar në studion e lajmeve në MCN TV, gazetari i ekonomisë, Klodian Tomorri, tha se gjetjet e raportit janë vetëm një pjesë e vogël e asaj që ka ndodhur me ligjet e miratuara vitet e fundit. Tomorri solli si shembull rastin e ligjit për dividendin, që sipas tij kishte për qëllim lehtësimin nga detyrimet të ish-kompanisë AMC.
“Raporti ka dhënë vetëm një pjesë të asaj që ka ndodhur. E kam të vështirë të gjej një ligj që është bërë në 2-3 vitet e fundit që ka të bëjë me kapjen e shtetit. Mund të përmend që nga ligji për uljen e dividendit që kishte target ish-kompaninë AMC. Përmes atij ligji u falën 35 milionë euro taksa me ligj në Parlament. Ligji i Teatrit është shembulli si shteti vihet në funksion për të kënaqur interesa të caktuara klienteliste”.
Sipas Tomorri, në kushtet e një drejtësie jofunksionale, ligjet me porosi nuk dekurajohen.
“Mekanizmi kryesor është drejtësia. Një sistem i pavarur dhe funksional do të bënte të zbulohej mekanizmi. Por kjo nuk ndodh në Shqipëri. Dini nëse është hetuar ndonjë ligj i tillë? Nëse prokuroria dhe i gjithë sistemi do të bënin punën e tyre, çdo zyrtar do të mendohej mirë para se të ndërmerrte një hap të tillë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
