Komunikimi mes kryeministrit dhe kreut të shtetit në lidhje me dekretimin e ministrit të Brendshëm do të vijojë. Kështu thuhet në një njoftim të shpërndarë nga Kryeministria pas takimit që kreu i qeverisë, Edi Rama, pati me presidentin Meta paraditen e sotme.
“Me kërkesë të tij, Kryeministri u takua me Presidentin e Republikës, për të diskutuar rreth përmbajtjes së letrës së këtij të fundit mbi propozimin për dekretimin e Gjeneral Sandër Lleshit si Ministër i Brendshëm. Bashkëbisedimi ishte i hapur e konstruktiv dhe kryeministri do të vijojë komunikimin me Presidentin e Republikës”, thuhet nga burime zyrtare të kryeministrisë.
Mosdekretimi i Sandër Lleshit, Rama i shkon Metës në zyrë
Mosdekretimi i Sandër Lleshit si ministër i Brendshëm nga presidenti Meta ka çuar sot kryeministrin Rama në Presidencë. Takimi në zyrën e kreut të shtetit vjen me kërkesë të vetë kryeministrit Rama, një ditë pasi Meta njoftoi mosdekretimin e propozimit të Ramës për postin e ministrit të Brendshëm.
Një ditë më parë, Rama iu drejtua me një mesazh deputetëve të vet, të cilëve u kërkoi të mos bënin asnjë koment në lidhje me këtë çështje.
“Lutem asnjë lloj komenti askush për vendimin e Presidentit! Ne jemi shumica dhe ne kemi detyrën t’u dalim Zot njerëzve, vendit, Kushtetutës me maturi dhe vendosmëri. Politika është shah, mos e harroni”, thuhej në mesazhin e Kryeministrit drejtuar deputetëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
