Udhëheqësit e BE kërkuan solidaritet më të madh me vendet e treta për shpërndarjen e vaksinave, ndërkohë që Presidentja e Komisionit Evropian Ursula von der Leyen tha se Ballkani Perëndimor do të marrë vaksina nga BE sa më shpejt të jetë e mundur.
Sipas Von der Leyen, sistemi COVAX, i cili ka për qëllim prokurimin e vaksinave për vendet me të ardhura të ulëta dhe të mesme, aktualisht ka probleme me shpërndarjen e vaksinave.
Von der Leyen shtoi se BE po krijon "një korsi tjetër" për të dhuruar doza për vendet e Ballkanit Perëndimor direkt nga Shtetet Anëtare të BE.
“Unë propozova një mekanizëm të BE me të cilin ato vende do të kenë akses në një pjesë të vaksinave nga rezervat tona. Ne mund dhe do të duhet ta bëjmë atë pa ndërprerë fushatat tona kombëtare të vaksinimit dhe në koordinim me kompanitë farmaceutike, ” tha Von der Leyen pas samitit të liderëve të BE.
Ajo shtoi se të ndihmosh vendet e treta për të marrë vaksina është në interes të vetë BE-së.
“Sa më gjatë që virusi qarkullon nëpër botë, aq më i madh është rreziku i mutacioneve dhe aq më i madh rreziku për shëndetin tonë. Kjo është arsyeja pse është në interesin tonë të ndajmë vaksinat me rajone të tjera të botës në një fazë të hershme, " vuri në dukje Von der Leyen.
Përveç mbështetjes së Ballkanit Perëndimor dhe fqinjëve në prokurimin e vaksinave, udhëheqësit diskutuan gjithashtu dorëzimet e vaksinave brenda BE-së, fushatat e vaksinimit të filluara në të gjithë Evropën dhe certifikatat e vaksinimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
