Sot mblidhet Kuvendi, opozita në protestë

Opozita do të vazhdoi sot me vazhdën e protestave për herë të tetë para Parlamentit, në kohën kur mbrenda saj zhvillohet seancë plenare.

Organizimi i protestës do të jetë i njëjtë me atë të shtatë protestave të mëparshme, ndërkohë që mësohet se peshën kryesore, në mungesë së kryetarit të PD, Lulzim Basha, i cili ndodhet për një vizitë pune në Berlin, do ta mbajnë të rinjtë e forumit rinor të PD-së.

Njëkohësisht me marrjen e vendimit për protestë është mobilizuar dhe policia. Forca të shumta policie do të jenë të stacionuara tek parlamenti dhe pranë disa institucioneve të tjera kyçe.
Protesta e fundit ishte më 28 mars dhe policia procedoi penalisht 28 persona, mes tyre dhe organizatori, sekretari i përgjithshëm i PD Gazment Bardhi.

Opozita ka paralajmëruar protesta sa herë të ketë seancë plenare për të kërkuar dorëheqjen e kryeministrit Edi Rama dhe një qeveri tranzitore që do të përgatisë vendin për zgjedhje të parakohshme të lira dhe të ndershme që do i hapnin rrugën Shqipërisë drejt integrimit.