Gjykata e Strasburgut ka zbardhur vendimin për 21 janarit, ku rezulton se ka shkelje në rastin e Aleks Nikës. Në vendim thuhet se duhet bërë hetimi dhe të dënohet fajtori, kushdo qoftë, si dhe duhet kontrolluar ligji për armët, nëse i përmbush apo jo standardet.
Gjykata konstaton se ligji i kohës dhe plani i masave të Gardës ishin me shkelje dhe nuk garantonin jetën, e kësisoj shteti ka përgjegjësi për vrasjen, ndërsa shkelje konsiderohet edhe moszbardhja e ngjarjes. Nuk ka një dëmshpërblim për familjen Nika, pasi xhaxhai i të ndjerit, Mark Nika, nuk ka kërkuar një gjë të tillë. Ndër të tjera është konstatuar edhe shkelje e të drejtës së jetës.
“Nisur nga vlerësimi i lartpërmendur, Gjykata arrin në përfundimin se përdorimi i forcës vdekjeprurëse nga oficerët e Gardës Kombëtare, që rezultoi me vdekje të Aleks Nikës, nuk ishte në përputhje me rreptësishtë kërkesat e nenit 2 të Konventës. Gjykata ka konstatuar mangësi në kuadrin ligjor që rregullon përdorimin e armëve potencialisht vdekjeprurëse në lidhje me operacionet e kontrollit të turmës në përgjithësi, defekte serioze në
planifikimin dhe kontrollin e ngjarjes në shqyrtim”, thuhet në vendim.
“Në të vërtetë, qeveria e paditur ka pranuar se një përdorim i tillë i forcës ishte joproporcional. Ka shkelje e aspektit përmbajtësor të nenit 2 të Konventës”, thuhet në konkluzione.
Kujtojmë që Aleks Nika mbeti i vrarë në protestën e 21 janarit 2011 në bulevardin “Dëshmorët e Kombit”, bashkë me 3 protestues të tjerë. Familjarët e Nikës dërguan padi në Gjykatën Europiane për të Drejtat e Njeriut, por pa kërkuar një dëmshpërblim monetar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
