Presidenti Donald Trump theksoi se priste një njoftim zyrtar që javën e ardhshme koalicioni që luftoi kundër militantëve të Shtetit Islamik e ka rimarrë të gjithë territorin e mbajtur më parë nga grupi ekstremist.
"Ushtria e Shteteve të Bashkuara, partnerët tanë të koalicionit dhe Forcat Demokratike të Sirisë kanë çliruar pothuajse të gjithë territorin e mbajtur më parë nga ISIS në Siri dhe Irak", tha Trump në një takim në Uashington me zyrtarët e Koalicionit për të Mposhtur ISIS.
"Duhet të njoftohet zyrtarisht, ndoshta javën e ardhshme, që do të kemi 100 për qind të kalifatit, por dua të pres fjalën zyrtare. Nuk dua të them shumë herët", tha Trump në takimin në Departamentin e Shtetit të SHBA.
Ndërsa Sekretari amerikan i Shtetit, Mike Pompeo, iu tha aleatëve se tërheqja e Shteteve të Bashkuara nga Siria nuk është “fundi i luftës së SHBA-së” kundër grupit ekstremist Shteti Islamik (ISIS).
Shefi i diplomacisë amerikane tha se grupi militant vazhdon të paraqesë kërcënim të rrezikshëm.
“Luftën do ta vazhdojmë përkrah jush” iu tha Pompeo zyrtarëve nga 79 vende të botës që janë pjesë e koalicionit në luftën kundër grupit militant Shteti Islamik.
Në takimin e mbajtur të mëkurën në Uashington, sekretari Pompeo, siguroi aleatët se Shtetet e Bashkuara “do të vazhdojnë të udhëheqin” luftën kundër militantëve të Shtetit Islamik por gjithashtu iu bëri thirrje aleatëve të angazhohen për mundjen përfundimtare të grupit militant.
Sekretari amerikan i Shtetit tha se tërheqja e trupave amerikane nga Siria është në thelb “ndryshim taktik” dhe jo “ndryshim i misionit”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
