Deri më tani nuk ka asnjë provë për shkencën, por pas gjykimit të rastit të një punonjësi të Telecom Italia, të prekur nga neurinoma e nervit akustik, Gjykata e Apelit në Torino nuk ka lënë vend për dyshim. Për gjyqtarët e shkallës së dytë, të cilët konfirmuan dënimin e dhënë në vitin 2017 nga shkalla e parë e gjyqësorit, ka një lidhje shkak-pasojë midis këtij tumori të trurit (formë beninje) dhe abuzimit të telefonit celular. Sipas gjykatës, Instituti Kombëtar i Sigurimeve kundër Aksidenteve në Punë (Inail) duhet t'i paguajë paditësit një pension të përjetshëm për sëmundje profesionale. Ndërkohë, vendimi rihap diskutimin mbi pasojat e ekspozimit të tepërt ndaj valëve elektromagnetike.
"Mjafton të përdorni celularin tridhjetë minuta në ditë për tetë vjet dhe jeni të rrezikuar", thonë avokatët e të dëmtuarit.
"Dënimi është historik, siç ndodhi edhe në shkallën e parë të gjyqësorit. E jona është një betejë për të rritur ndërgjegjësimin. Informacioni mungon, pavarësisht se kjo është një çështje që prek shëndetin e qytetarëve".
Nuk ka studime shkencore që konfirmojnë lidhjen e përdorimit të celularit me predispozitën e shtuar për t’u prekur nga tumoret, në mënyrë të veçantë ato të trurit. Megjithatë, nuk janë të pakta hipotezat sipas të cilave, kompanitë e mëdha të telefonisë celulare bllokojnë daljen e konkluzioneve të tilla.
Megjithatë, në vitin 2011, Agjencia Ndërkombëtare për Kërkimet mbi Kancerin e ka futur fushat elektromagnetike me radiofrekuencë në listën e faktorëve kancerogjenë.
Por pavarësisht kësaj, shumë studiues thonë se ndryshe nga faktorë të tjerë që ndikojnë në shfaqjen e kancerit, si duhani apo alkooli, për fushat elektromagnetike nuk ka ende elementë që provojnë lidhje të drejtpërdrejtë me sëmundjen e rëndë. / ANSA / Përgatiti: Gazmira Sokoli /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
