OSBE: Nuk ka më kohë, të nisë puna për reformën zgjedhore

“Nuk ka më kohë për të humbur, puna për reformën zgjedhore duhet të nisë tani”. Ky është apeli i prezencës së OSBE-së në Shqipëri lidhur me përmbylljen në kohë të reformës zgjedhore. “Ka mbetur vetëm një muaj e gjysmë deri në fillimin zyrtar të përgatitjeve, mandati i komisionit të posaçëm të reformës zgjedhore skadon më 9 dhjetor dhe procesi i reformës zgjedhore nuk ka nisur ende. E thënë thjesht, nuk ka më kohë për të humbur!” tha përfaqësuesja e Prezencës së OSBE-së, shefja e zyrës politike Carolina Ramos Da Costa.

Ajo përcolli mesazhin e Kryetarit të Prezencës, ambasadorit Bernd Borchardt, që komisioni i posaçëm për reformën zgjedhore të mblidhet dhe të rifillojë punën, me kapacitet të plotë, sa më shpejt që të jetë e mundur.

“Është thelbësore që reforma të përfundojë në kohën e duhur përpara zgjedhjeve. Që kjo të bëhet realitet, komisioni duhet t’u japë përparësi fushave të tij të punës, në mënyrë që të realizojë një reformë zgjedhore e cila i trajton të gjitha rekomandimet e OSBE/ODIHR-it dhe që, gjithashtu, i përfshin të gjithë aktorët në një proces transparent”, tha ajo.

Ramos Da Costa bëri disa sugjerime, si ngritja e platformave për raportimin e shpenzimeve të partive politike dhe rasteve të dyshuara të korrupsionit; vendosja e përgjegjësive të brendshme të qarta në KQZ për mbikëqyrjen e financave të partive; pajisjen e partive politike me një program kompjuterik financiar vetëm për financimet e partive politike; si dhe botimin nga KQZ-ja të çmimeve të referencës për veprimtaritë zgjedhore.

“Një sugjerim i fundit: ne e konsiderojmë si tejet të rëndësishëm botimin nga KQZ-ja të çmimeve të referencës për veprimtaritë zgjedhore. Cili është çmimi i një veprimtarie me 300 apo 3,000 njerëz? Cili është çmimi i një pankarte të vogël ose të madhe? Cila është kostoja e një zyre zgjedhore në Tiranë, Koplik apo Leskovik?”, tha ajo.