Ministri izraelit: Është e drejtë t’i vdesim urie 2 milionë banorë të Gazës, por nuk do na lejonte bota

<p>Ministri izraelit i Financave, Bezalel Smotrich, është shprehur se “<em>mund të jetë e drejtë dhe morale</em>” të vriten duke u lënë pa bukë 2 milionë banorë të Gazës derisa pengjet izraelite të kthehen, por <em>“askush në botë nuk do të na lejonte”.</em></p> <p>Në një fjalim të hënën në Konferencën e Katif për Përgjegjësinë Kombëtare në qytetin Yad Binyamin, ministri i ekstremit të djathtë tha se Izraeli duhet të marrë kontrollin e shpërndarjes së ndihmave brenda Gazës dhe pretendoi se Hamasi ka në kontroll kanalet e shpërndarjes brenda rripit.</p> <p>“<em>Është e pamundur në realitetin e sotëm global të bëjmë luftë – askush në botë nuk do të na linte t’i vdisnim nga uria dhe etja dy milionë qytetarë, edhe pse mund të jetë e drejtë dhe morale derisa ata të kthejnë pengjet tona</em>”, <a href="https://edition.cnn.com/2024/08/06/middleeast/israeli-minister-smotrich-starve-gazans-intl/index.html">tha ai</a>, duke shtuar se nëse Izraeli do të kontrollonte shpërndarjen e ndihmave në vend të Hamasit, lufta do të kishte përfunduar tashmë dhe pengjet do të ishin kthyer.</p> <p>“<em>Ju nuk mund të luftoni Hamasin me njërën dorë dhe t'i jepni ndihmë me tjetrën. Janë paratë e tij (të Hamasit), janë karburanti i tij, është kontrolli i tij civil i Rripit të Gazës. Thjesht nuk funksionon</em>, "citohet ai nga CNN.</p> <p>Izraeli ka kontroll mbi ndihmat që hyjnë në Gaza dhe grupet e ndihmës janë përgjegjëse për shpërndarjen e tyre. Ndërsa ka pasur disa raporte nga gazanët e Hamasit për vjedhjen e ndihmave, është e paqartë se në çfarë mase ndodh kjo. I dërguari i posaçëm i SHBA-së, David Satterfield, tha në shkurt se asnjë zyrtar izraelit nuk i kishte paraqitur atij apo administratës Biden <em>"prova specifike të devijimit ose vjedhjes së ndihmës".</em></p> <p>Izraeli po përballet me kritika në rritje nga grupet e ndihmës dhe organizatat ndërkombëtare për kufizimin e ndihmave ushqimore për Rripin e rrethuar të Gazës. Një deklaratë e Kombeve të Bashkuara, duke cituar ekspertë të pavarur, tregoi muajin e kaluar se uria është përhapur në të gjithë enklavën. Ekspertët akuzuan Izraelin për kryerjen e një <em>"fushate të qëllimshme dhe të synuar të urisë"</em>, të cilën ata e quajtën një <em>"formë të dhunës gjenocidale".</em></p>