“Shtëpia e barit” në Vlorë, shkon në 4 numri i të arrestuarve/ Emrat

Shkon në katër numri i të arrestuarve gjatë operacionit të koduar “Kushtrimi”, ku pas të arrestuarit të parë janë vënë në pranga dhe tre të tjerë.

Gjatë ditës së djeshme, e mërkurë, u bë arrestimi i Elmaz Elmazit, 33 vjeç, Erand Malkaj, 32 vjeç, banues në Vlorë, me detyrë elektricistë pranë OSHEE Vlorë, dhe Marsel Rrapaj, 33 vjeç, banues në Vlorë, me detyrë faturist pranë OSHEE Vlorë, për veprën penale “Shpërdorim i detyrës”.

Arrestimi i tyre, u bë pasi në zonën që ata kishin në monitorim, nuk kanë konstatuar lidhjet e paligjshme të energjisë elektrike në banesën në përdorim nga A. Rr., e cila ishte përshtatur si ambient për kultivimin e bimëve narkotike kanabis sativa në kushte laboratorike.

Gjatë operacionit u zbulua një banesë e përshtatur për kultivimin e kanabisit, me anë të llambave, si dhe u konstatua lidhje e paligjshme elektrike.

Në banesën në përdorim nga Anest Rrapaj, në lagjen “Kushtrimi”, u gjetën të kultivuara në kova plastike, në një ambient të mbyllur, rreth 330 bimë narkotike, mbi të cilat ishin të vendosura 88 llamba, 18 freskuese, 5 aspiratorë dhe objekte të tjera që shërbejnë për kultivimin e bimëve narkotike në ambiente të mbyllura, të cilat u sekuestruan në cilësinë e provës materiale, së bashku me një sasi materiali bimor kanabis sativa në proces tharjeje.